琥酌 (已搬遷) 新店位置

突然日本癮發作，又想食日本菜添。今次唔食壽司唔食拉麵，揀左間有日本燒肉既餐廳黎食😋。哩間琥酌環境都算唔錯，周圍擺滿左日本酒壺作裝飾，坐係到感覺好似置身於日本架。入到黎已經聞到好香燒肉味，加上見到隔離台個吉列牛定食賣相都唔錯，所以就揀左黎食。等左陣，d食物就好快黎到。侍應哥哥仲好好咁介紹左醬汁同食法俾我地知。食法好簡單只要將吉列牛放上爐燒10至15秒就可以食得，非常方便。因為我本身食野比較慢，所以哩類燒住食既定食就岩哂我，食到先燒，確保牛肉入口熱辣辣。塊吉列牛外面炸過，裡面仲係生既，唔算肥，有小小脂肪係中間。燒得太短時間會少少韌，燒耐啲啲就會淋啲，我就覺得燒15秒岩岩好。吉列牛本身已經好夠味，不過鍾意濃味既可以點埋個鹽燒汁、海鹽或者黃芥末，會有另一番味道。朋友喉嚨唔係幾舒服享用唔到個吉列牛，簡簡單單食個炒飯，估唔到都咁有驚喜。炒飯炒到一粒粒，好乾身。除左明太子，仲食到好重既菇味，非常足料。有少少辣，好開胃，令人食唔停口。另外個雜菌湯都值得一提，湯好清勁香菇味。個沙律又超多海蜇🤤🤤。