JD Euro (Jade) Cafe & Bar (已結業)

第一次食土耳其菜，估唔到咁新奇！我同朋友兩個人叫咗dinner set for 2($498)，本身冇包餐湯，但係餐廳話送餐湯俾我地試下！餐湯係扁豆湯，啖啖都飲到豆蓉，香滑creamy。 特色沙律，有沙律菜、蕃茄仔、青瓜、紅蘿蔔片等等，非常新鮮爽脆，特別中意蕃茄仔嘅口感同甜味。 特色小食，係炸薯條、燒茄子，上面鋪咗２片薄餅，香口得黎又唔油，燒茄子特別惹味，仲配上茄醬同埋麻醬，攞薄餅包住食就更有風味。 主菜我揀咗牛肉，係薄切牛扒配薄餅。牛扒有一個手掌咁大，用黑椒粒黎調味，唔會太生，係我中意嘅熟度，肉質條理分明，鮮甜得黎又非常有口感。 估唔到竟然再送咗甜品，係伊斯坦堡龍鬚糖，賣相精緻，食落同香港嘅最大分別係，佢冇咁入口即溶，所以反而食到層層嘅絲。隔離仲有一爐土耳其嘅糖，口感唔知點形容好，好特別。 依款係土耳其茶，類似紅茶嘅味道，可以加少少檸檬汁同糖黎調味。 土耳其菜有啲似西餐，但係會 佢嘅調味同醬料同西餐又唔同喎，仲有唔少特色菜，值得一試！