潮人私房菜 (已結業)

今日適逢考完試，朋友就話帶我地來呢度試吓私房菜，講真上黎果陣好似好暗，我哋都有少少驚，一禁門鐘主人家就好熱情咁招呼我哋入嚟，地方仲相當企理！我哋叫咗一個套餐，朋友神神秘秘我都唔知道其實裏面有咩菜式，一開頭就嚟咗個胡椒豬肚湯，我本身唔食豬肚，因為我覺得內臟會污糟，朋友鼓勵之下我就試一試，結果一試就愛上啦，豬肚嘅味道唔怪而且吸收左胡椒嘅香氣勁好味呀。頭盤係三款潮式嘅滷水食品，我比較欣賞嘅係個豬肉，你見到一層層冇乜肥肉，開頭我擔心感受嘅豬肉會好硬，點知唔單止入味肉質仲好易入口。呢個鮑魚花雕蒸水蛋都係一個好吸引嘅菜式，有四隻咁大嘅鮑魚唔在話下，蛋白真係好好味，本身我怕淨係蛋白會冇普通蒸水蛋咁好味，點知我送左兩大碗飯哈哈 另一個推薦菜式係爆汁蝦丸，唔好意思整到個賣相咁肉酸，因為唔記得咗影。入面有少少好似芝士嘅流心效果，一食點知竟然係甜嘅！店員叫我地估下係乜嘢材料，我覺得好似係燒嘢食會食到嘅但又醒唔起係乜嘢，原來竟然係棉花糖啊，用咗嘅棉花糖同蝦丸出奇地咁夾，係今晚最大嘅驚喜！