鉄人大盛 (已結業)

最近見到好多朋友都去咗尖沙咀食呢間鐵板燒放題，聽返嚟嘅評價都唔錯，我諗一定好出色！趁星期六得閒就同朋友嚟試一試先！價位算中價，$328一位！另收加一服務費時間方面｜有三個時段揀，每個時段限時2個鐘！一坐低諗住tick 嘢食嘅時候，有個侍應行埋嚟話唔使tick 刺身住，佢哋整好咗一個拼盤！呢樣有好有唔好啦，因為有啲人淨係食某啲款，唔食某啲款！如果唔食又會浪費食物！好嘅方面就係唔使自己諗，可以一次試晒咁多款！我哋今次坐喺其中一張鐵板燒枱，師傅喺我哋面前即時煎！佢同我哋講想食煎魚，唔使劃單，同佢講報就OK，佢會即刻煎！呢份檸檬牛油煎魚扒真係不得了，一上枱已經聞到勁香！表面金黃色真係好靚！入面仲好嫩滑添呀！最like食冇骨嘅魚！Menu上面嘅泰式雞扒係原塊嘅，但上枱佢係切成細細塊，其實咁樣仲正，方便我一啖一舊！真係有啲泰式嘅味，甜甜哋少少辣！出色！厚切牛舌都值得一讚，有啲胡椒味，表面煎到有啲焦香，正！鯖魚就比較失色，乾身咗啲！鰻魚都唔錯，唔係啲渣貨~甜品有哈根大師雪糕~