鮨見 (已結業)

今日 第一次去咗食澳嗎卡斯,估唔到出乎意料之外咁好食， 太興奮喇，所以忍唔住要即刻寫低食咗啲乜。 Omakase即係廚師發板, 你唔會知道嗰餐食啲乜嘢。你畀一個價錢，然後師傅會根據嗰日既食材，精心挑選最新鮮嘅海鮮畀你。我哋兩個人去，一個揀咗一個380嘅餐，一個揀左580嘅餐。嘩真係有好多嘢食㗎，食到後面我都太飽，有d食唔落。掛住食都唔係好記得啲魚叫咩名。不過就有鯛魚，海膽，鯥魚，赤貝， 帶子，池魚，藍鯨吞拿魚，廣島生蠔等等。我最最最最欣賞就係佢嗰個海膽杯， 真係成杯都係海膽嚟㗎。同個師傅言談間，佢話佢一板海膽都要成二千幾蚊港紙。真係真材實料。又唔腥，有淡淡嘅海水味，食得出真係好新鮮㗎。必食。其次，我鐘意食鯛魚壽司， 入口即溶。 你會見到壽司上面有一滴醬，每一滴醬都唔同。譬如有麵豉醬，柚子醬同埋辣醬。 嗰個辣醬有啲似tobasco，我真係好like吖。佢哋嗰度地方細，我諗一眼望落去可能得10至15個位左右。所以如果想上去食，真係要預早打電話去預約先。 好在我個friend醒，有一早打去訂位，如果唔係都唔會有位呀。