韓味屋

營業中

休息中

去完年宵後去左北角丹拿道韓味屋食野，由於幾好食所以寫返篇食評。雖然舖頭細細不過招呼周到，我地4個人食左個幾樣野都幾正。1.韓式炒粉絲比起我一般食既炒粉絲更加有味，而且裡面菜既口感非常好，同粉絲既煙靭互相輝映。2.全州石頭鍋飯非常足料，加埋辣醬香度倍增，天氣凍食真係不得了。3.人蔘雞煲呢個真係好正，一飲落去，唔單止係味覺上既刺激咁簡單，仲即時感覺到有種能量由淡湯注入身體，飲完一碗時我已經額頭出汗，加上仲要加左糯米，令口感更加好，細問下發覺原來係新鮮雞，唔怪得個湯咁濃味d雞肉仲咁有味有口感。4.豆腐海鮮湯因同行朋友唔食得辣，叫左小辣，豆腐滑，海鮮足，飲得出唔係味精，配碗白飯真係一流。總體黎講真係幾正，前菜有好多款，任食唔嬲，茶亦唔係普通既茶，係韓國茶，加埋員工熱情招待，食得好開心，最可惜係掛住食唔記得影相。