梧桐館 (已結業)

水上人執笠之後，西環尾只係得返南記依啲連鎖店，睇網上知道西環尾有間出名嘅粉麵店，所以上年十一月夜晚第一次來試食，叫咗碗紫菜四寶河，墨魚丸同貢丸都有驚喜，同平時食開嗰啲真係有分別，你食過一次就會明白。隔離嗰位大叔叫咗碟鵝腸撈，我唔係咁識得欣賞內臟，但見到佢食得咁滋味，我諗有機會我都會食一次。今日來食下午茶，再上OpenRice睇食評見到有唔少差評，主要係講冇服務，我今日一坐低樓面立即遞杯水俾我，令我大感詫異，可能係前人feng得佢多，間店舖有所改善，收銀阿姐都有講多謝，希望keep到服務水準。今次食碗牛腩麵，其實都幾冒險，因為鹼水做得唔好就好大浸味，我平時一定會叫牛腩河。除咗第一啖聞到有鹼水之後食落去，麵身好脆同冇鹼水味，牛筋多個牛腩，牛筋係一整條脆的，牛腩份量就比較少同鞋冇乜特別，整體而言成碗麵份量都算少。西環街坊來講都可以食多次。兩次來食都覺得啲食客好似都係喺區外人入嚟食，冇乜後生仔。當係支持吓啲傳統食物，唔想日日食米線，又食唔慣啲螺絲粉。食完都有少少口渴，返屋企前買咗杯飲品。