嘉兵衛 (已搬遷) 新店位置

同屋企人食飯，佢地喜歡日本野所以就帶佢地黎呢間響母校附近的日式小店，食過一次午餐，但晚飯都係第一次。七點九黎到都坐滿左九成，落單前老闆娘已經同我地講定因為係即叫即煮，所以會等得比較耐，前面好幾張枱的客都未有野食，而望返廚房只有兩人煮野食。所以黎呢度食晚餐，需要預返落單後最少半個鐘先會有野食。但食物質素令我覺得等都值得！點左個塩燒黑豚扒定食，上菜時有埋胡椒同鹽俾你調味，不過個人覺得本身已經好夠味，肉帶少少肥膏，所以咬落去肉汁非常多，肉質都比較嫩，只係食到邊邊位就會實返少少，但都係水準之內。黑豚扒旁邊配生菜絲，另外仲有味噌湯，一睇之下已經覺得不得了，湯用左好多材料去煮，連肉粒都煮得非常入味同淋，係一咬即散開同溶的感覺。食日本野不妨配返支細細的清酒，180ml的白壁藏純米酒非常易入口的。