籠太子點心專門店 (已結業)

今晚係筲箕灣東大街食晚餐，突然想食點心但冇得飲茶，所以就去咗籠太子點心專門店，餐廳上菜速度快，每枱仲放咗一壺玄米茶方便添飲。首先梗係嗌蝦餃啦，佢哋嘅籠太子蝦餃皇可以只叫兩隻，唔需要擔心太飽，蝦餃同蝦都好大粒而且熱辣辣。之後叫咗多汁蟹籽小籠包，小籠包入面有薑絲，唔需要另外加，餡肉亦都夠juicy。仲叫咗黑松露燒賣，比一般燒賣多咗陣黑松露香，但咬落一樣啖啖肉。晚餐都要有飯落肚嘅，所以我哋就試咗石斑荷葉籠仔飯 ，可以揀落蔥同豉油調味。飯入面有蛋絲，每啖飯都夾雜著蛋香同荷葉香，石斑魚肉彈牙有鮮味，亦唔會腥。是日精選老火湯係霸王花煲豬骨湯，每羹都感受到膠質十足，非常足料，飲落甜甜地同時唔會太油膩。最後叫咗碟菜心，顏色翠綠而且嫩口鮮甜。