昌哥粵菜館

營業中

休息中

我成日覺得山珍海錯整得好食係理所當然，因為材料本身往往已經贏在起跑線，而且一般嚟講靚嘅材料都唔會交畀啲廚藝普普通通嘅廚師處理，所以我自己認為越簡單嘅菜式就越能夠顯出師傅嘅功架，就好似呢一間粵菜館咁樣。叫咗四個好普通嘅餸，四個都非常出色。椒鹽鮮魷：魷魚新鮮肉質彈牙，炸粉漿厚薄適中，椒鹽份量啱啱好。子薑菠蘿咕嚕肉：肉質新鮮，食落去覺得師傅似乎用傳統嘅山楂去做個汁，所以個酸甜味係令人有一種好舒服嘅感覺，d子薑令到碟咕嚕肉生色不少。涼瓜炒蛋：呢個最有驚喜，好少食到涼瓜炒蛋可以有咁滑嘅蛋。南乳粗齋煲一啲都唔粗，南乳味比較溫和，當然入面嘅材料都好新鮮啦。