蒸廬

營業中

休息中

放假最好同屋企人歎一盅兩件，奈何好多酒樓都係藍嘅連鎖店，除左早排告急嘅富東閣外，沙田友可以考慮下蒸廬。雖然店仔細細，但點心燉湯甜品樣樣齊，屋企人都幾滿意食物質素，今次已經第3次到訪。每逢六日都人頭湧湧，好彩我11:30前到，無幾耐已經有十幾人排隊。.南瓜鳳爪排骨飯:籠仔荷葉蒸飯係佢地嘅拿手菜，阿爸每次可以食晒一個，啲排骨嘅蒜香同淡淡嘅荷葉香滲落飯粒度，排骨唔梅但有少少肥，個飯仲有南瓜粒同菜心鋪面，配搭均衡。鮮蝦菜苗餃:菜苗餃有滿滿嘅豆苗，鮮蝦無雪味，可惜今次塊皮太軟，一夾跌晒啲餡出黎，上次無呢個問題，應該一時失手。.魚湯蟲草花鮮竹卷:呢個有啲驚喜，腐皮厚薄適中，魚湯煮到奶白色清清地，無蠔王/上湯咁油膩。綠茶豆沙煎軟餅:呢款喺其他酒樓無見過，嗰皮綠色好搶眼但有色無味，口感煙煙韌韌，豆沙餡稍甜，但作為飯後甜點都唔錯。之前食過佢嘅黑金流沙包同其他點心都有一定水準，不過近廚房位置嘅衛生情況欠佳，喺客人坐嘅地方附近倒水同垃圾，幾次黎地下都係濕嘅，希望店家改善下。