盈記四季養生麵館

營業中

休息中

食米線食得多，要求自然高左好多，餸好味就基本，湯底夠唔夠真材實料都好重要。藥膳農場雞厚身花菇養生湯第一啖就感受到濃濃嘅菇味，大花菇非常厚身彈牙，入味而唔會太鹹，最正嘅係連個藥膳湯都好有菇香，有深度。 傳說中嘅三黃雞果然好嫩滑，雖然唔係舊舊都係雞髀，但都好厚肉有雞味。 藥膳湯好鮮甜，連米粉都有驚喜，幼滑有彈性，浸湯浸得耐都好食，份量仲要多到兩個人都夠食。鮮茄自家製水餃湯粉難得令我有種飲緊住家湯嘅感覺，車厘茄同蕃茄滾出嚟嘅湯好鮮甜，顏色淺啲但絕對冇溝水，真實嘅蕃茄味好濃。 水餃肉餡唔算好多，但可能餃子皮本身都煙靭好味，調味簡樸清淡都已經好夠味，每次見到餃子必點嘅朋友表示滿意。藥膳湯墨魚春卷煙韌彈牙，藥膳湯同加左花菇嘅版本原來都好大分別，比較清甜，小食都唔油膩，夠健康幾好。奶茶紅豆冰好足料，奶茶茶膽仲要好濃，值得一試。