影片
更多
2011-06-14
899 瀏覽
適逢聖誕佳節，又得知XO仔未有機會食過米芝蓮三星既餐廳，Auntie二話不說就帶左我去見識見識，真係口福不淺哦。環境衛生：（米芝蓮之第一粒星）六星級酒店內既餐廳樓面勁高，地方寬敞闊落，枱同枱間又夠空位，所以一Ｄ都唔迫，又唔會太嘈。燈光柔和，帶份高雅既情調，可能因為冇左平時中菜既強烈油煙味，感覺好似入左間高級西餐廳咁。雪白既餐巾同枱布，加上潔亮既餐具，令有潔癖既auntie都食得好安心。服務：（米芝蓮之第二粒星既頭半粒）1) 一坐低就有條熱毛巾暖吓手，冬天時分最舒服不過。2) Auntie點嗰樽酒，餐廳本身缺貨，不過經理反應好快，話只要比佢十五分鐘既時間，佢就可以特別安排倒，果真冇食言。感動！3) 面帶笑容既經理，態度友善，令小弟見識到乜野叫專業既溝通技巧：除左同各類客人都可以有講有笑，寫餸時提供客觀既意見，上菜時亦詳細地解說食材同烹調方法；見倒我好勤力地寫筆記，更好有耐性地講Ｄ餸名比我抄添。4) 被扣一分既原因：茶水唔係擺放喺枱上，而係分開放；所以如果哥哥仔唔加比我地，我地就會好口乾。加酒加茶速度唔夠密，所以我地既茶杯同酒杯好多時都係吉既。味道：（米芝蓮之第三粒星）廚師好講究食物既pr
環境衛生：（米芝蓮之第一粒星）
六星級酒店內既餐廳樓面勁高，地方寬敞闊落，枱同枱間又夠空位，所以一Ｄ都唔迫，又唔會太嘈。燈光柔和，帶份高雅既情調，可能因為冇左平時中菜既強烈油煙味，感覺好似入左間高級西餐廳咁。雪白既餐巾同枱布，加上潔亮既餐具，令有潔癖既auntie都食得好安心。
服務：（米芝蓮之第二粒星既頭半粒）
1) 一坐低就有條熱毛巾暖吓手，冬天時分最舒服不過。
2) Auntie點嗰樽酒，餐廳本身缺貨，不過經理反應好快，話只要比佢十五分鐘既時間，佢就可以特別安排倒，果真冇食言。感動！
3) 面帶笑容既經理，態度友善，令小弟見識到乜野叫專業既溝通技巧：除左同各類客人都可以有講有笑，寫餸時提供客觀既意見，上菜時亦詳細地解說食材同烹調方法；見倒我好勤力地寫筆記，更好有耐性地講Ｄ餸名比我抄添。
4) 被扣一分既原因：茶水唔係擺放喺枱上，而係分開放；所以如果哥哥仔唔加比我地，我地就會好口乾。加酒加茶速度唔夠密，所以我地既茶杯同酒杯好多時都係吉既。
味道：（米芝蓮之第三粒星）
廚師好講究食物既presentation，個人覺得好有法國餐既影子，唔怪得知會冧倒法藉既米芝蓮啦。（米芝蓮之第二粒星既尾半粒）香麻素生根：餐廳為慶祝聖誕節而送比客人既特別冷盤。爽口既生根，簡單輕巧，加上淡薄既芡汁，食得健康。
龍帶玉梨香：$20/隻；一款好有層次，而又配搭新穎既菜式。淨係材料都唔簡單：底層既啤梨，配上層既帶子，夾住中層既蝦膠，再以金華火腿於頂部點綴。功夫都唔弱架：蝦膠係即日用新鮮蝦打製，好彈牙滑身；火口控制得恰到好處，所以整體可以炸到香口得黎一滴油都冇，而且帶子重好嫩。啤梨既味道好清新，蝦膠同帶子就好鮮甜，金華火腿既微咸令成件龍帶玉梨香非常野味。隨餸附上檸檬汁同華鹽比大家加以調味，但個人覺得原汁原味更顯特色。龍景軒之特色推介一！
媽媽當晚講左句好有意思既說話：＂新鮮既海鮮理應鮮甜，所以烹調或進食時無需多餘既調味；點汁液既作用其實係遮蓋一Ｄ唔新鮮食材所發出既腥味或異味。＂椒鹽田雞腿：$300；依味餸大家要襯熱食，因為好快涷。層炸粉夠薄，所以好香脆。田雞腿底既炸魚仔薄到好似食緊魚味薯片咁，Chinese Kongfu真係犀利！功夫田雞腿推介二！
爸爸唔講，冇乜常識既ＸＯ真係唔知，原來田雞腿既肌肉同肌肉間藏有好多tapeworm（寄生蟲），所以一定要煮到熟先好食，唔係就會有機會食到生蟲。炒田雞腿係最危險既，因為好多時會炒得唔夠熟；椒鹽田雞腿就冇問題，因為要經滾油炸過。鮑汁扣鴨肝：$150/隻；鴨肝係蒸既，厚厚既一片好滑溜，而且唔會滯住個胃，感覺好似比鵝肝健康。用甜甜既鮑汁襯托鴨肝，再加幾條鮮橙皮絲（唔係陳皮）喺面，中式得黎帶有法國味。招牌菜之推介三！
羊肚菌日本青尖椒和牛粒：$1,230；和牛粒既大細切得好適中，最精彩既係師傅既炒功，時間火口都掌握得好好，牛肉每粒都保持四成熟，軟軟地溶喺口！拌碟既羊肚菌好甜，我地唔洗五分鐘就清哂成隻碟。
臘味蓮藕餅：$240；又一款可以表現出師傅廚功既一味！新鮮滾熱辣炸出黎，蓮藕餅雖然比薯片厚，不過係我食過之中最薄既，而且一Ｄ都唔油膩，香脆無比；細細粒既蓮藕好甜，餅內既肉碎就帶點微辣，造得好出色！拍爛手掌之推介四！
清炒菜心：$180；清炒真係清炒，並冇多餘既油或芡汁，絕對健康。菜心好甜；餐廳真係捨得，睇相都見倒每條都揀得好深好心，簡直係菜心既心臟地帶呀。好心健康推介五！
龍景軒炒飯：$330；炒得好有鑊氣又夠乾身，配料中既海鮮新鮮爽甜，非常香口，所以小弟食埋媽咪嗰碗。鑊氣推介六！
桂花糕：送；清甜香滑，正呀！
椰汁馬豆糕 + 馬仔：送；馬仔夠鬆化，爸爸好欣賞。椰汁馬豆糕都好清，不過ＸＯ仔都係比較喜歡清純Ｄ既桂花糕。
核桃酥：送；上枱時重以為甜品就係好大粒既核桃，咬落先知每粒都係好鬆化而又唔會過甜既核桃酥，真係好有驚喜呀！
抵食：茶：每位$20；酒：共$4,280；食物：$2,970
唔包酒，但連加一，每位大概HK$550；食物當中包括和牛，餐廳重要係喺六星級酒店入面，平心言論真係算幾低。
後記：
1) 以上米芝蓮之三星分析純粹小弟之愚見也。
2) 食好野時可以見識倒精湛既廚藝，學倒咁多野，依頓米芝蓮三星宴真係可以話係大開眼界，獲益良多呀！
張貼
