天龍燒鵝 (昌業大廈)

營業中

休息中

由米芝蓮2星天龍軒燒味部主廚所開嘅燒味舖，咁快就開咗第二分店。同樣都係係軒尼斯道，呢間就近銅鑼灣鵝頸橋。分店好似細少少，但外面掛著一樣咁多燒味。呢度燒鵝皇、乳豬、仲有「肥燶腩叉」係必叫招牌菜，今日仲試埋豉油雞試吓添。食燒鵝最正就一定係燒鵝髀，燒鵝髀配瀨粉就一定唔會錯，可以叫燒鵝髀免切就可以成隻渣著咬，鵝油又滴返落碗瀨粉度，啖啖都係鵝香。乳豬皮夠脆，估唔到D肉仲咁滑，已經將骨起咗，食得好方便。肥燶腩叉淨係見過賣相已經流口水，絕對係米芝蓮級數。肥肉係爽，加燶燶地嘅邊位夠曬香，食落口除咗叉燒甜味，仲有豉香味。最後估唔到連油雞都咁出色，香滑有雞味。其實呢度每一樣嘢個質素都咁穩定，真係可以媲美名牌老店。