佳牛美酒 (已結業)

係一餐相隔幾個月都不時會回味嘅lunch～話說有日同同事喺銅鑼灣附近做嘢，突然斥起條筋，醒起之前睇過呢間佳牛美酒出lunch set，價錢都幾相宜。平時夜晚就應該唔捨得食佢，咁啱經過附近就決定上去會一會佢！叫呢道，本身只係諗住任何事物加黑松露都係無敵嘅搭配。不過放入口真係充滿驚喜。炙燒咗嘅A4和牛每一塊都係呈半生熟狀態，一咬落去首先係焦香嘅牛味，之後再咬就係軟嫩嘅半生熟口感，十分出色！呢個係和牛肉餅+太陽蛋嘅組合。唔知點解「肉餅」兩個字本身聽上去唔太fine dine嘅感覺，但我同同事都不約而同話對呢個有興趣！ 果然出到黎完全無令我地失望。和牛打成嘅肉餅的確牛味濃郁，而且肉汁滿滿。太陽蛋做到燶邊！100分！ 雖然唔係好驚天動地嘅烹調方法，但食落完全感受到廚師嘅用心～總括而言，呢個價錢食到呢個質素嘅食物+服務，完全收貨㗎啦！唔知佢依家仲有無做lunch set，如果有，十分推薦大家一試！