川粵時光 (已結業)

銅鑼灣登龍街嘅V Point一直都係美食集中地， 今日就嚟到28樓食川菜。 餐廳叫川粤時光， 個名好優雅特別餐廳亦都係行優雅高級格調， 大大嘅落地玻璃睇住維港景色，一路食住美食，十分寫意 。酸辣魚皮， 作為前菜呢個真係好開胃， 酸酸辣辣，配埋爽口帶啲煙韌嘅魚皮十分好食。涼拌秋葵， 爽脆嘅秋葵配埋惹味嘅醬汁, 令人回味, 鍾意食秋葵嘅朋友, 絕對唔可以錯過。口水雞， 麻辣口水雞，雞肉十分嫩滑， 食落亦都唔會太辣， 對於鍾意食辣，但又唔係食得太辣嘅人，呢個絕對可以選擇。黃金椰菜花， 鹹蛋黃醬完美地包圍住椰菜花 ，十分香口，椰菜花亦十分新鮮， 對於鍾意食鹹蛋黃醬嘅朋友，呢個值得推介。青椒開胃清香鱸魚， 作為主菜呢個真係超級好食，青椒湯酸酸辣辣， 鱸魚完美地吸咗湯汁 一啲都唔腥， 最欣賞係佢嘅底層仲有麵線， 麵線索曬所有嘅汁， 食辣一流。幻彩荔枝養生花茶， 顏色十分亮麗， 荔枝味好濃帶住花茶嘅清香，解辣一流。蘋果汁， 不過不失， 十分正常。紅糖冰粉， 作為甜品紅糖冰粉絕對係一個川菜最後完美嘅句號， 好似啫喱一樣彈牙嘅冰粉 配紅糖水同西瓜肉，絕對係完美。