勝手 (已結業)

銅鑼灣出名多野食，中西日、多國菜要乜有乜，我同阿妹都係火鍋控，左揀右揀決定試下呢間「勝手」日式火鍋。火鍋店位於百德新街一條小巷入面，如果唔細心留意好容易miss左吧！同一般火鍋店唔同，「勝手」嘅裝修似傳統日本壽司店，大部分座位都係吧枱形式，好似喺壽司店食omakase咁！每人座位前有一個小鍋用黎打邊爐。火鍋湯底有4款選擇，分別係𩶘魚湯、昆布鰹魚湯、壽喜燒同埋泡菜湯。最近轉季塊面爆瘡爆得特別勁，所以揀左清清地嘅「𩶘魚湯」，湯底一上枱先飲一啖，魚湯鮮甜之餘「零腥味」，飲下飲下不知不覺飲左兩大碗，湯底再添加都係加返原湯，並唔係加水，所以湯底絕對唔會被溝淡，超正！配料方面鹿兒島A5和牛絕對係必點之選！和牛輕輕淥一淥就可以，口感勁軟勁鬆化，牛味濃之餘油香亦非常豐富！絕對係一試即愛！鹿兒島黑豚亦十分唔錯，肉質鮮嫩，雖然無和牛果種澎湃嘅油香，但反而有淡淡嘅清甜香，一點豬肉「蘇」味都無。打邊爐又邊少得海鮮呢！鮑魚彈牙爽口，又唔會太韌。蟶子爽脆之餘非常鮮甜味美，唯一美中不足係切得太細，好容易淥淥下唔見左呢！蔬菜類當然唔少得！雜菜盤最岩好似我咁貪心嘅人，樣樣試少少，有菇、有瓜又有好多不同種類嘅菜，樣樣新鮮