S2 Kitchen (已搬遷) 新店位置

呢日同朋友慶祝生日，去左一間位於中環嘅日本餐廳。呢間餐廳嘅食物賣相全部都好精緻，而且味道都相當唔錯喔～溫泉蛋沙律沙律菜新鮮爽脆，沙律汁酸酸甜甜，配上溫泉蛋，味道增添左一份香濃嘅感覺。刺身三文魚鮮味爽口，配上海藻同海葡萄一齊食，味道層次就更豐富啦～另外一款魚刺身配上黑松露醬一齊食，味道好香濃。海膽天婦羅第一次食呢道菜，海膽味道都幾鮮甜，外脆內軟嘅口感非常特別。天婦羅壽司卷餡料有吞拿魚腩，所以食落充滿油香味。壽司外層炸得脆脆的，口感層次豐富，好食！吞拿魚碎多士吞拿魚好香，同沙律醬味道好夾，加落多士度一齊食，感覺好特別。柚子烏冬散發出淡淡柚子香味，烏冬軟滑，味道不錯喔！柚子芝士餅味道好清新，口感幼滑，感覺好似食緊雪糕咁，好好食！😻另外值得一讚嘅係老闆會買啲香港好少見嘅酒提供俾客人飲，我地今次飲嘅紫蘇梅子酒味道真係好特別，梅子味好濃郁呀！想同朋友飲返兩杯，品嚐下色香味俱全嘅日式小菜，黎呢間餐廳都係一個唔錯嘅選擇。