黑木 (已結業)

走到尖沙咀嘅韓國街，搵到一間專門燒物嘅地方。環境唔錯跟足日本式嘅簡約設計。都一開門嘅右手邊就見到個燒爐，油煙都唔係太勁，要讚吓佢個抽風做得唔錯。主打係燒物，另外仲有一啲烏冬同埋湯類選擇。首先食返個日本季節限定即開生蠔，味道鮮味，有陣陣嘅海水味爽口。雞腎燒到啱啱好，一啲都唔乾，質感爽口彈牙。燒芝士年榚，外皮帶少少脆，食落好軟綿綿，芝士味好濃。燒雞翼，燒到啲雞皮黃金色又脆口，飲清酒嘅好良伴。雞皮，同雞軟骨都係水準之作。是日限定-岩鹽燒香魚，脆皮嘅魚肉味道帶少少甘苦。我最鍾意嘅燒飯團，金黃嘅飯焦包住彈牙嘅日本珍珠米，加埋微辛明太子。最後食埋個烏冬，烏冬係用麵條即時煮成，所以特別彈呀。