Potluck Eatery

今日係拍拖五周年紀念，同老婆嚟咗呢間喺佐敦新開嘅餐廳食晚餐，可能新開冇耐未有太多人知道，人唔算多唔駛等位。餐廳嘅裝修佈置好精緻，亦好闊落空間感十足，一入門口仲有啱晒女仔嘅打咭位！我哋叫咗兩份晚餐，跟餐有湯、飲品同甜品。首先上菜係湯同蒜蓉包，湯嘅材料好豐富，有洋蔥、蘿蔔、薯仔，仲有啲薏米，配搭幾特別幾好飲！【脆炸魷魚伴墨魚汁沙律醬】另外叫咗份小食，炸魷魚個粉醬炸到脆卜卜，點埋個墨魚汁沙律醬好夾。但大家食呢個就要小心啲，好易食到成嘴黑晒，哈哈！【牛油香煎帶子鮮蠔汁意大利飯 】帶子用牛油煎到微焦，意大利飯嘅濕度同軟硬度啱啱好。睇佢個名以為得「蠔汁」，原來入面都有唔少蠔仔肉喎，啖啖都充滿蠔味好鮮味！【炭燒美國安格斯肉眼】肉眼扒叫咗七成熟，入面仲好粉紅亦唔會太生，火候控制得好好！牛肉味濃肉好淋唔韌，係食到最後兩舊有啲根位。配菜嘅BB薯仔同脆肉瓜都好好食。跟餐嘅甜品一啲都唔馬虎，係千層蛋糕版嘅Tiramisu，相賣勁精緻，食落唔會太甜亦唔膩，戒甜嘅我今晚破戒食咗，好好味，哈哈！