財記美食 (已結業)

有一日喺YouTube上面睇到有個頻道介紹亞洲美食，其中一間就係觀塘嘅財記美食，見到超有火喉嘅小炒，再加上又近自己，就搵埋屋企人去食返個晚餐，做好安心出行同埋量體溫就安排入座！椒鹽鮮魷，魷魚新鮮唔霉，面粉底唔厚，除咗脆口之外，魷魚嘅味道更加突出。仲有除咗有炸蒜之外，仲會有啲辣椒碎，辣味令到道菜更惹味，我哋都更加開胃！豉椒炒蜆，好大碟，真係好大碟！蜆既量多，蜆肉都好鮮甜，豉椒味道夠。所有蜆受熱都好平均，全部都開晒殼，而且冇沙冇泥，洗得好乾淨！西蘭花蜜椒腰果牛柳粒，腰果即炒好脆口，牛柳粒有些少煙韌但牛味夠重，最突出嘅係個蜜淑汁，蜜糖味濃，配埋甜椒做出嚟嘅汁醬同牛柳粒不謀而合，放底嘅西蘭花都吸晒所有味道既精華！菜遠斑腩炒麵，斑腩量多又大舊，咬落口啖啖肉。而最重要就係個面底，面底煎得夠香脆，多餘嘅油份都分隔咗出嚟，唔會令到碟底充滿油份，再者茨汁嘅份量都啱啱好，唔會令到個煎面底咁快變冧！