農

營業中

休息中

好兄弟係科學園返工，話呢間都幾多人食，我就帶埋老公一齊去食Lunch。一入見到啲公仔包真係好靚好想食😍口水彈蛋，幾辣幾開胃，鵪鶉蛋係溏心，即刻加分👍牛油果蝦春卷，熱辣辣，夠香脆，牛油果同蝦味道好夾，幾好味。避風塘軟殼蟹，呢個超讚好香口，香港風味，少少辣，軟殼蟹又唔會炸到好乾，味道好好😋田園炒花青苗 (XO醬)，少少辣，花青苗好似一個迷你青瓜咁幾得意、幾爽脆。貓山王榴槤，其實係榴槤糕，不過切開每啖都有榴槤纖維🙂農仔荷葉飯，一上枱好香荷葉味，上菜好快，所以其他菜未食晒已經上咗荷葉飯，到我哋食嘅時候，荷葉飯已經唔熱，味道係OK嘅，如果熱啲應該會更好食。白桃烏龍茶、桂花烏龍茶，無加糖，清香甘甜，我就鍾意白桃味多啲，男人們就覺得桂花味夠清香，兩個都幾好飲。我哋仲叫左肉骨茶，中藥味好濃，老公話好飲，用紫砂茶壺裝住幾別緻，但一杯一啖要倒幾十杯先飲晒😂以上已經好飽，食唔落公仔包，下次再試。