盈圖

營業中

休息中

老公今日要去大角咀做嘢，得一個鐘食飯，喺網上搵到呢間見大家話平靚正，上菜速度都好快。 隨便嗌咗幾樣，真係好似大家話咁上菜速度好快。熱辣辣嘅蒸包就係特別好食，嗌咗個黑金流沙包上手已經覺得好軟熟，包面好似燙金嘅盈字，一啖咬落去啲餡就流曬出嚟，鹹蛋味好香，沙沙地嘅口感，三兩下食晒三個。燒賣好大粒，上面仲有隻鮑魚，賣相比起平時嘅燒賣吸引好多。鮑魚爽口唔霉，豬肉都唔會滯或者好硬，兩粒兩個人食啱啱好。 小籠包入面滿滿嘅金黃色湯汁，皮仲好薄，夾起嚟皮都冇穿，師傅手勢真係好犀利👍 一啖一隻，啲湯汁喺口裏面爆開，湯夠哂濃郁有豬肉嘅香味，豬肉都嫩滑，一個人食晒一籠都唔會誇張。百花釀魚肚蒸出嚟味道好清新，下面厚厚地嘅魚肚處理得好乾淨，完全冇腥味，滿滿嘅魚香味，值得推薦！