La Kaffa (已結業)

放假去咗住係馬鞍山迎海既朋友屋企玩，之後就落咗迎海薈商場行下睇下有咩食，商場雖然唔係好大規模不過就應該足以滿足住戶嘅需要，有兩間酒樓、5 間食肆、超市、屈臣氏、阿信屋、7-11、Starbucks、Salon 等等。見到呢間西式餐廳有全日早餐食，而且價錢又唔係好貴，所以就揀咗呢一間。黃金法式吐司 ($56) : 相當豐富，有兩塊薯餅、兩隻太陽蛋、兩條法式香腸、兩件黃金多士、沙律菜、茄汁豆。薯餅熱辣辣脆卜卜，黃金多士軟熟而且選用蜜糖代替糖醬，食落更滋味。煙熏三文魚牛油果醬吐司 ($48) : 爽口沙律菜伴碟，配上炸薯角同煙三文魚蕃茄三文治。三文治用上麥包製成相對健康，不過牛油果醬味道就唔太突出。不過呢間餐廳無凍檸茶叫有啲失望，所以就叫咗凍奶茶，奶茶係台式奶茶嚟，奶味比較重同較滑，不過茶味就不及港式奶茶。