海安咖啡室 (已結業)

海安對住信德中心，干諾道呢個位經常有五金工程類嘅車人出沒，有少少大塵嘅感覺，不過咁又增加咗茶餐廳嘅懷舊氣氛。十一點幾十二點去到，冇乜人，不過差唔多所有卡位都有人留座。坐落冇耐，就陸續有客到。生意應該唔錯。坐落點咗個招牌鍋仔公司麵同奶茶紅豆冰。後者先上，前者後至。此冰基本上係紅豆加凍奶茶。唔會太甜，奶茶亦算中上級數，加埋紅豆一齊飲，味道十分有層次。奶茶本身味重，等啲冰溶到咁上下個味就最正。鍋仔公司麵可算係香港comfort food嘅精神代表。簡單快捷又好食，速戰速決，要comfort都要講效率。公仔麵加麻油，麻香一上枱已經撲鼻而至，其中加上太陽蛋，煎餐肉，腸仔，生牛，五香肉丁，同小量菜。原本應有叉燒，不過早到未有，以鴨胸取代。每樣少少，加埋算配料十足。每樣其實都唔算特別出眾。老老實實，一個咁樣嘅麵自己嚮屋企都整到。而且呢類嘢食真係好難會難食或者特別好食。不過無論如何食起上嚟的確夠晒comfort。呢個都算係香港特色：平凡有效率，雖無驚喜，卻令人滿意。總結：有懷舊嘅本土氣氛。路過可以一試。下次我都會嚟再試下午茶先供應嘅西多類食品。