Green Common (將軍澳中心) (已結業)

平時素食一定唔係我首選，就算知道Green Common開到周圍都係，但一直都未試過，但今日經過被佢哋個新menu吸引！餐廳除咗有堂食位，仲有grocery shop。自選套餐（$95）- 包小食、主菜同飲品，如果外賣仲有8折，好掋食。Omni新蟹餅 - 完全食唔岀係素食，外表炸到金黃香脆，而入裡個口感同蟹肉極之相似，仲有好香嘅胡椒味，一定要試。葡汁新炸魚柳燴藜麥蒟蒻米 - 蒟蒻米高纖低熱量，低升糖，減肥人士必食！撈埋葡汁真係好似飯。而舊炸魚柳一啲都唔輸真魚柳，雖然無魚嘅鮮味，但勝在口感相似。焙茶拿鐵（+$15）- 用嘅係Minor Figures oat milk沖，用植物奶就更健康喇。焙茶味好濃郁，最好嘅杯嘢飲整唔甜。流心香芋西多士（$46）- 好似好邪惡咁😂 但熱辣辣嘅西多真係好難抗拒！個西多即叫即整，好軟熟又有咬口，而入面嘅流心香芋唔會好甜，但就好香，味道同口感都好夾。驚你唔夠香芋，仲另外俾個香芋蓉你淋落好，作為糖漿嘅substitution真係非常好。