互動瑜伽素食 (已結業)

Item: 互動瑜伽素食
Rating: 3
Author: 陳真

Yoga Interactive Vegetarian

6 食評

味道

環境

服務

衛生

抵食

686

尖沙咀

$101-200

港式素食私房菜

陳真

等級4

164

表姐E, 同表妹J的合併生日會, 之前有人提起想試一試瑜伽素食, 但一直都沒有人評價過, 故沒有什麼衝勁特登去食. 直至是次, 表姐E也提及要試一試瑜伽素食, 而且又看了Yan 同 Small JJ 的介紹. 覺得此地應該是不錯的私房素食. 眾人就決定選擇這裡作為她們的生日晚會場地.

我們沒有包場咁誇張, 不過看其介紹, 的確, 可以包他們個場黎做function. 我們選擇的日子, 剛好是星期五, 打上來book檯時, 原來差不多已經full house. 正式來說, 他們只開一個單位來做飲食, 另一個單位, 是瑜伽練習室. 由於是日full house 的關係, 兩邊都開哂, 而我們就安排在了坐在瑜伽練習室, 地方比較細, 坐得當然冇咁舒適.

我們叫他們等人齊才上菜, 等待中, 店員 (一位老外/南亞瑜伽大師)先把黃薑飯同一壺檸檬薑茶盛放在我們檯上. 那壺檸檬薑茶, 味道甜帶少許酸, 薑味重, 有辣喉的感覺但勝在夠甜, 令味道中和一下. 令平常不太愛食薑的我也喝上數杯. 有檸檬酸又對我舒緩喉嚨不適有幫助.

湯同飯, 湯是老火的雜豆湯, 味道濃香. 加有蓮藕, 亦帶有少少薑. 一方面清涼, 另一方面有薑來平衡一下, 令大家不會一味食涼既野.

之後是素腐皮卷, 味道較得比較清淡, 食落, 有素肉, 切成條的蓮藕, 餡料上乘, 好過出面街食的素腐皮卷多多聲.

再來的是蕃茄粟米, 沒有多加糖, 食到是蕃茄的原有酸味, 所以原生態既味道都加以保留. 粟米香甜, 加上蕃茄的酸甜. 感覺幾match, 而且因為以酸為主要味道, 所以令到我們好開胃. 正好為下一味菜鋪路. 然而, 這一味, 是用椰汁, 加上豆腐碎粒做汁, 再撈上翠玉瓜同蓮藕, 汁有椰香, 呢味餸既主題係甜, 味道其實不太習慣, 配上翠玉瓜, 再將汁用來撈飯還好, 相對, 蓮藕就好似唔係太Match啦.

吃完甜、酸, 之後兩味是苦. 一個稔葉薯蓉, 同一份炸苦瓜. 此時, 大麼姐姐埋黎同我們解釋一下是日菜單既主題. 原來是讓食客食齊5種味道. 甜、酸、苦、辣、咸. 呢一晚, 五種味道, 我們都會食齊. 而且她解釋為何菜式大多數有薑呢, 事因素食比較寒涼, 薑是熱的, 用薑可沖減其他素菜的寒氣.

稔葉薯蓉, 味道是清淡的, 薯仔既原味, 沒有特別的加工. 唯一加上的, 便是一小片稔葉. 此小片稔葉, 味道非常之濃, 廚子小姐解釋了一大輪食稔葉的健康道理. 只可惜大家沒有什麼心機去深入理解佢既效用. 稔葉帶出的, 正是苦味, 小小的一塊, 已能令到整隻薯蓉帶甘味. 薯蓉本來是滯肚之物, 但加上了稔葉, 那種滯同飽肚既感覺大為減少.

炸苦瓜, 對吃得苦的人來說, 呢味餸算是整晚做得最好的一份. 至少是我最欣賞的一道菜. 炸粉不厚, 食落不油. 做得非常之好. 伴上一個綠色既醬黎點苦瓜食, 帶甜的汁, 原來是用芫茜同腰果磨出來的醬, 點苦瓜食, 中和一下苦味. 但不點醬, 我覺得才能食得出苦瓜的甘香.

苦之後, 是辣. 辣的菜式, 是沙爹炒粉絲. 辣只是小辣. 粉絲有沙爹味但味道不算太重. 可惜的是炒得太乾. 做得未算出色.

食完甜、酸、苦、辣. 最後的兩個主菜, 是咸. 首先是豉椒炒茄子, 用上西蘭花去配搭. 不過, 說是咸既菜式, 的確是咸, 但感覺上太鹹. 豉椒落得太重了, 有失素食的清淡主意. 雖然呢道菜既主題係咸, 但也不要盡咸. 另外的一碟鹽水蕃薯苗, 咸味適中, 菜又夠腍, 大家都非常欣賞.

食完一眾主菜, 當然有個甜品時間, 而是日甜品是南瓜蓮子薏米糖水, 帶點薑汁味, 所以都係辣辣地, 起初飲落, 第一個口感就覺得南瓜同薑汁不太match, 不過飲飲下又覺得ok. 太太不喜歡就由我飲埋果半碗, 只是有切cake時間而令我只飲了一半而已.

總括來說, 食物味道尚算ok, 應該是人多吧, 出菜時, 發覺他們上得有點亂, 而且不知是否要安排到眾人上天台一起聽瑜伽學說, 出菜時覺得是有心拖慢, 好讓大家同一個時間去學習一課. 而我們就沒有勁去聽了, 8個人, 留來切餅餅好過. $150一位, 價錢同味道, 算是可以吧.

店員的用心解釋每一道菜, 細心的服務其實是值得加許的, 不過上菜慢, 就扣了少少分數. 而且, 這裡是瑜伽中心, 入來時, 所有人需要除鞋, 正因為咁, 衛生方面, 這裡做得非常之好.