住家餃子專門店 (利源東街)

營業中

休息中

利源東街同利原西街係好多中環打工仔既飯堂，平時幫襯開「天之樂素食」同「Kale」，最近發掘下其他店，原來唔少都有素食架！「住家餃子專門店」有兩款素餃，一款係白菜豆乾素餃，另一款係新豬肉素餃。有得揀既話我會盡量食返啲天然野，所以白菜豆乾素餃就啱哂我。一個餐有6隻餃子、一個冷麵同一個綠豆沙，相當豐富。餃子仲有唔同既醬揀，我就揀左大路既豆瓣醬。為免啲員工將素餃同其他有肉既餃子撈亂，啲素餃係用綠色既餃子皮包既。啲餃子既size偏大，非常飽肚，皮薄餡靚，唔點醬都好夠味。冷麵個芝麻醬係普通日式芝麻醬，一般都有蛋奶，所以冇食到，用左豆瓣醬黎撈，辣辣地幾惹味架。個麵仲落左冬菇、大豆芽同木耳，都算有誠意。每次嗌外賣都好掙扎，因為會製造好多垃圾。為左減少對環境傷害，大家記得拎啲膠去回收呀。回收前一定要洗乾淨，一齊努力為環境出一分力啦。