從心素食 (漆咸道南) (已結業)

唔知從心素食同大自然素食係咪同一個老闆，佢地個menu都幾似。明明係食素，但個menu入面竟然可以有各款肉類同海鮮既section，真係叫人嘖嘖稱奇，絕對係齋口唔齋心既表現。不過作為一個愛動物既人，理得啲人個心齋唔齋，只要唔傷害動物就ok喇。啲素肉同素海鮮都多添加劑，同埋好多都有蛋奶成份，而依啲中式素食店通常都淨係mark邊啲菜式有蛋，又唔會mark奶，所以對vegan黎講素肉都係少食為妙。於是我地就淨係叫左一款係有素肉既。沙嗲羊肉串配木綿豆腐既羊肉係大豆做既素肉，幾有咬口，沙嗲醬既花生醬味好出，啱哂我依啲花生醬控。木綿豆腐加埋啲醬食都幾夾。芝麻香橙骨係用猴頭做既，非常香口，外脆內面都仲好juicy，份量都唔算少，幾滿意。雜菜咖喱包啲餡好澎湃，切果陣係咁湧出黎。如果個汁可以杰啲就好，太稀瀉到四圍都係，食到有啲呢hea。食飽阿姐會送糖水，不過我地已經好飽，就此謝過阿姐美意。唔知係咪疫情關係，週末夜晚去個場都唔full，唔book都可以唔洗等就入座。香港既餐廳要努力撐住呀，希望好快見到曙光啦。