V.W Vegan Cafe (已結業)

大埔既素食餐廳唔多，只有位於舊大埔警署既「慧食堂」同「多利民素食」。依家多一間純素既文青cafe，雖然唔算好就腳，不過多個選擇都唔錯。如果本身唔係住大埔，可以喺大埔壚站搭K巴去到超級城再行過去。雖然而過午飯時間，但店外都仲有人等緊位。等位既位置喺室外，都有啲熱，好彩好快就等到位。Menu唔算太多野揀，揀左個日式定食。份量比預期細，如果有食過佐敦MUM Veggie Cafe，依度既定食份量大概係MUM既2/3。味道唔算好有驚喜，如果下次黎會想試其他款。蛋糕櫃入面有幾款vegan甜品，當中Lemon Tart個樣最吸引。個餡酸酸甜甜都唔錯，不過個皮就略嫌過厚，食落有少少乾，有待改善。叫左3樣野，最滿意既係Mango Smoothie。好rich有好濃既芒果香，如果大杯啲就更好。總括黎講都有改善空間，期望佢地越做越好。