有緣小敍

營業中

休息中

佐敦住宅區既橫街小巷入面有好多食店，當中更有米芝連推介級數既小店。當初吸引到我地黎有緣小敍就係佢地既biang biang麵啦，一碗麵入面得一條麵，勁有gimmick。一入到鋪就見到好多兵馬俑既擺設，加上微暗既紅燈籠，真係覺得自己去左西安咁。打開個menu見到都有唔少素食，仲有得揀唔同既辣度。依度啲野都真係幾辣，唔太食得辣既記得叫微辣好喇，小辣都有少少令人想噴火！豆角燒茄子炒得好乾身，不過茄子既份量就略嫌比以前黎果陣少左啲，變左個小配角咁。味道方面就非常惹味，少少辣相當過癮。主角既biang biang麵係可以做素食架，走左肉汁就得。雖然未食過有肉汁既時候係咩味，但冇肉汁版既味道絕對唔差。最正係放喺麵上面果一撮仔紫菜，有少少炸過咁，脆脆地幾好食。次次食biang biang麵必做既就係搵個頭同尾出黎，檢查下佢係咪真係一條過，咁佢又真係冇令我地失望過！土豆絲同豆角燒茄子比就濕少少，食落有少少孜然味，我地覺得唔錯，不過果陣味就未必人人受落。唔知幾時再有緣黎依度小敍呢！