天之樂素食 (已結業)

天之樂素食係一對銀髮夫婦開既，希望推廣素食同埋天貝既好處。天貝又叫黃豆餅，係印尼既黃豆發酵食物，有豐富既蛋白質，更被譽為素食中既肉類，不過喺香港就暫時唔算多人識，只係得印尼鋪見到佢既蹤影。作為一間小小既外賣店，佢地既款式算係好多，有漢堡啦、焗飯、焗意粉、仲日日有多款中式餸配飯，日日食都唔會悶。不過要留意有啲焗野係有芝士既，唔係vegan架。天貝漢堡份量超大，塊扒仲大過個包！塊扒可以揀原味或者咖喱味，原味就鹹鹹地咁，同個蘋果醬幾夾。不過個包就偏乾，可以考慮落多幾塊生菜令個包濕潤啲。素肉醬意粉將啲天貝切碎成素肉，蕃醬稠度適中，又唔會太濃味，食落覺得幾健康。中式飯就淨係試過一次，對個素鴨有少少失望。一般素鴨都會煎香左再煮，但依個似乎係直接攞左去煮，唔夠香口，可能係想健康啲啦。值得一讚係個飯，加左少少藜麥落去，又有營養又健康。開頭唔知焗意粉係有芝士，打開果下有啲失望，最後要撩返走哂啲芝士。後來向店方反影，佢地都好快手改返個menu，加左芝士icon仔等人知邊啲款式係有奶，等vegan唔洗再中伏。以價錢黎講個質素算ok，對中環成日要買外賣食既打工仔黎講係個健康又抵食既選擇。