夏雪 (已結業)

終於有機會出去抖下氣，唔駛困住係屋企。因此，要食啲好野獎勵一下自己。我去左大圍一間叫夏雪既cafe，係大圍站行過去5分鐘度就到。利申：本身讀大學個陣已經有去開佢西環間分店度食waffle。今次想試下大圍呢間。cafe內面勁有文青feel，亦都有唔少後生仔女坐係度飲杯coffee 吹下水，個氣氛同格調都唔錯。我地叫左一個忌廉芝士窩夫配沙律，要左牛油果同煙三文魚 (HKD 80)同埋全日窩夫早餐 (HKD 108)。個忌廉芝士窩夫係咸咸地，有別一般甜既窩夫，味道幾特別，做brunch其實都真係唔錯。佢地好細心咁將啲牛油果切成一片片咁方便食。個煙三文魚都好整齊咁伴碟，味道算係幾鮮甜。整個賣相唔錯，顏色豐富。跟住黎既就係all day breakfast，材料都幾豐盛。有香腸，炒啡菇，煙肉，茄汁豆，忌廉芝士窩夫同炒蛋。香腸同煙肉整得好好，咬落去好稔，味道又唔錯。個啲啡菇都算大塊，炒蛋就又香又滑。雖然今次係咸食為主，但都好好味，同佢既主打甜食一樣咁出食👍🏻