板長壽司 (屯門時代廣場) (已結業)

Item: 板長壽司 (屯門時代廣場)
Rating: 4
Author: 奧志雷

Itacho Sushi (Trend Plaza)

3.5

46 食評

味道

環境

服務

衛生

抵食

685

屯門

$101-200

日本菜壽司/刺身

奧志雷

等級4

2.1K

每次都預早少少入座打點一切，等待您的到來。被迫坐迷你二人枱，食多幾道菜都無位放，仲要放埋調味料、餐牌、用具，迫上加迫，討厭。Asahi 生啤，繁忙工作過後，來杯冰凍啤酒大口灌入，人生一樂也！

赤酢壽司系列，池魚皇、伊佐目、平目魚。飯粒程淡淡淺啡色，獨特的味道與香氣。由淡食到濃依次序，全部白肉魚都係較清淡的，不過各有所長。池魚皇極有彈力，魚味清爽。伊佐目軟軟滑滑，陣陣鮮味。平目魚油油潤潤，綿綿甘香。

吞拿魚腩海膽丼，吸睛的畫面，刺身堆得滿滿，顏色鮮艷奪目，索一索聞得到的海鮮鮮味！侍應妹妹我係要有蟹腳既海鮮三色丼 $208 呢，依家變左吞拿魚腩海膽丼 $268 啊！最愛大大啖海膽刺身混在飽滿珍珠米間，頂層再鋪上油潤激甜大拖羅享用，色香味爆發到靈魂出竅，罪過罪過！麵豉湯，平實滾燙味濃，嘆完大碗飯狠狠灌入，痛快淋漓。和牛薄燒，嫩嫩綿綿鐵板燒薄切和牛捲著大量蔥花蒜蓉，香口惹味。

珍寶赤蝦刺身，赤蝦廿蚊有找抵到爛，雖然比牡丹蝦次一級，不失黏彈鮮甜。伴碟炸蝦頭凍冰冰，無肉無汁乾爭爭，只作裝飾吧。天婦羅盛，雜菜天婦羅包羅萬有，蕃薯、南瓜、紫蘇葉、茄子，新鮮鬆化，不硬不油。還有兩大條車海老點綴，肉爽香甜。

螢光魷魚軍艦，熟的螢光魷魚比起醃漬的失色許多，乾乾嚥韌，食味平凡。珍寶帆立貝壽司，無可抗拒的味道，鮮甜到世界盡頭！濕潤軟綿，拍爛手掌。廣島蠔，日本蠔一向味道清淡，配上蔥花蘿蔔蓉豉油，食其肥美爆汁！

鮮北寄貝裙邊壽司，充滿貝殼類的淡淡鮮甜，輕彈可口。酒煮日本蜆，火喉出色無過熟，鮮味爆燈，彈牙肥美多汁。鹽燒秋刀魚，天生魚油澎湃魚味特別濃厚，脆皮搭結實魚肉，每口噴著魚汁，不得了！

迷你三色丼，豪華一口壽司，三文魚子咸鮮脆卜卜在口裡爆破，吞拿魚腩蓉滴著甘甜魚脂，濕潤黏滑鮮甜海膽，合體攻擊，我完全投降了！油甘魚腩刺身，罕見程乳白粉紅色油甘魚腩，可遇不可求！魚脂極甜，肉質滑溜，魚甜味道非凡絕頂！

火炙大吞拿魚腩紅飯壽司，肥美到彷似豬肉一樣，炙完表面變成淺啡色而內裡保持誘人粉紅色更似豬肉！部份魚脂被熱力溶化，更油潤更濃郁更滑嘟嘟，焦香美味到死！火炙和牛壽司，無敵！全熟的外層，牛味超凡，中間紅紅嫩肉撞薑蓉蔥花，提鮮提味，百倍昇華。

赤貝壽司，食開即劏活赤貝，冰鮮貨雖爽爽，但根本滿足唔到我！大蝦壽司，熟到過晒龍，平平無奇。北寄貝壽司，味道清淡而軟腍，感覺一般。板長蝦壽司，即係天使蝦，千載不變淡茂茂，無味爽彈。八爪魚壽司，簡單就是美，咸鮮搭八爪魚鮮，邊爽肉彈做得好！三色壽司，伊佐目、油甘魚、秋刀魚，鮮鮮鮮、滑彈魚甜，質素穩定。

甜蝦壽司，嬌小玲瓏但美味絕倫！鮮北寄貝壽司，鮮甜綿滑無得頂！炸軟殼蟹，沒有驚喜偏硬脆漿，油不清澈炸得顏色暗淡，煎炸味強烈，幸好蟹鮮啖啖肉。熱燒玉子，乾鞋隔夜蛋一樣，二十成熟的老蛋翻熱出場！

大吞拿魚腩刺身，太凍還有霜，成塊排狗係眼前一樣！凍到牙都陣，影響口感同味道，好采夠肥美。魚脂超勁入口即溶滑溜溜。活北寄貝刺身，新鮮活劏，特別甜美，鮮氣盡露。原條伊佐木刺身，最愛原條鮮魚刺身，每次必食！綿綿清甜，越紅越美味可口。

火炙鹿兒島和牛赤酢壽司，雪花肥牛純天然甜味，炙過的焦香拼埋牛脂及赤飯，十全十美！珍寶赤蝦壽司，大大隻蝦眼前一亮，濕潤閃閃發光，爽甜黏滑。吞拿魚沙律軍艦，酸咪咪的沙律醬跟吞拿魚永遠絕配，用上刺身更加醒神開胃。芥辣墨魚軍艦，芥末刺激清新，墨魚黏黏充滿彈性。

廣島蠔軍艦，半熟漬蠔結實，蠔味香濃，肥美蠔肚射出蠔汁，鮮甜無比！極盛海膽丼，大大片鮮橙色兇湧海洋盡收眼簾！多多海膽少少飯，鮮甜味進入血液再運行全身，絕對無得彈！海膽迅間被我消滅掉，但仍有半碗飯呢！無緊要，仲有其他靚靚刺身可以同吃。