好雪片片 (已結業)

大約是兩年多前睇人地嘅食評發現左呢個樓上茶室，雖然話係茶室，但食物嘅選擇都唔少（香港租金咁貴，即使係樓上舖，如過只賣茶相信幾難維持），而最緊要嘅係，整體都好高質，加上環境清雅恬靜，絕對係約朋友小聚嘅好地方。已經有一段時間冇黎了，本來想試下帆立貝南瓜意大利飯，可惜當日唔供應，所以就要左白酒香蒜蜆意粉。好開心水準冇變，蜆係新鮮貨，排得好靚，意粉軟硬度剛好，夠爽身，有蒜片同少少辣椒煮好惹味，好快就KO晒。我嘅朋友要左蟹肉意大利飯，我試左一啖，飯係混入左蟹肉、蔬菜、忌廉同煮，都好好食呀！仲有叫左燒鰻魚飯，個汁係自家調較過，好似加左少少酒，鰻魚好香，我連飯試左一啖，都幾正呀~ （不過我只係細意品嚐，所以冇影到相）黎到呢度，我每次必食佢地嘅豆腐芝士餅，豆腐味超濃郁，又唔會好甜，加埋少少芝士嘅奶香，每一次都覺得好滿足！同埋用蛋白同糖整成嘅小蘑菇，令賣相好可愛呢！我地仲試左檸檬撻，有檸檬嘅清香之餘好醒胃；宇治抹茶卷蛋好大件，啖啖綠茶清香，中間嘅綠茶mousse 都好滑，伴埋紅豆一齊食，係唔錯嘅選擇。食左咁多野，當然要飲d茶啦，我個胃唔係咁好，就飲正氣d嘅普洱。呢度嘅普洱好清香呀，唔係出面嗰d深黑色冇味