仁利粥粉麵 (已結業)

2018年11月裝修前幫襯後，成個熟食中心就裝修，等咗2年啱啱今日經過見到開返舖，仲改咗新舖名「鴻記茶檔」。肥哥哥老闆依然冇變好好招呼，亦好有禮貌，一邊食一邊傾吓偈，人情味十足👍🏻。早餐只是$31，有沙爹牛面，煎雙蛋，奶茶☕️ 牛肉好新鮮，唔會似有一些茶餐廳預早炒定，擺到硬同吸晒汁好乾好咸，奶茶茶底唔會死苦味，好香好滑。介紹食呢度好出名嘅辣椒油🌶️，好好味，炒得好香好足料，食到有蝦米🦐仔，好似馬拉盞XO醬嘅味道。下次要食其他牛腩雲吞粉面配嚟食吓。見到午餐餐都好抵食，全部$42，尖沙咀真係難搵到。新裝修後，環境好好，好有懷舊感覺，清潔光猛又夠通風，鐵皮頂天花都高咗好多，感覺十分良好。而家開始入秋，冇咁熱，應該成日都可以去幫襯，唔怕邊食邊抺汗。暫時只有3檔開返，今朝我包場，只得我一個食客😄 到我走先有個男客人，見到只有我一枱客就坐咗隔離枱。眼見都只有幾個似係記者或寫文嘅人周圍影相同埋同老闆傾偈，應該係準備介紹呢個熟食中心重新開幕嘅報道。