時新快餐店 (已結業)

因為我之前同男友大人講好想去食呢度嘅漢堡包，咁所以就決定今日第一餐就試時新啦。位置就正正喺聯記川王隔離，所以如果未去過嘅朋友都唔易搵到。我哋大概十一點左右坐底，都未算太多人，不過唔洗一陣就有好多學生哥入嚟，十二點未夠就坐爆成間店咁泄啦。一望埋牆上個餐牌，花多眼亂，我最終決家要個芝士蛋漢堡加凍檸蜜，男友大人就要咗個雙層蛋漢堡加凍奶茶。之後見到有人order薯條，男友大人又話想試吓沙爹牛肉麵，就係咁我哋就追加埋呢兩味啦。好快啲食物就喺眼前，一拎個包上手，已經感覺到個嘉頓麵包好鬆軟，跟住我一啖咬落個包度...好好好好香嘅漢堡牛肉加埋洋蔥味同又香又濃嘅肉汁、沙律醬就逼入口，真係超好味，肉質鬆鬆軟軟得嚟有一啲肉粒，好有咬口，好有水準嘅港式漢堡。不過男友大人就話略嫌牛肉味唔太夠，不過佢整體都好滿意。薯條炸得透而且唔過火，好香口，但係一定要自行加鹽。沙爹牛肉麵就比較遜色啦，沙爹味唔夠，牛肉好似白烚咁，而個湯比較啖味，個麵質好硬，好似煮唔透咁，所以我同男友大人都只係食咗幾啖就放棄咗。總括佢嘅港式漢堡包真係名不虛傳，男友大人話下次要試埋其他醬汁(黑椒汁同咖喱汁)，而我就會試佢個魚柳包，好期望再會時新。