鳩砌

營業中

休息中

其實餐廳位置唔算隱蔽，反而對正大街，不過門面細細，唔講未必覺，好容易就會錯過咗好好食嘅漢堡😹記得有次想食，但後尾先發覺嗰日係開夜晚，最後唯有去咗附近食另一間burger。早兩日落雨，諗唔到食咩，最後終於買左外賣自取。唔睇清楚都唔知，原來呢度嘅漢堡係豬肉，好似係冇牛肉揀嘅。最後揀咗兩個芝士漢堡，其中一個係加咗雞髀菇。外賣嘅包裝可能可以改善。因為冇個盒之類裝住，其實只係大概10分鐘到路程，個包始終係即整，熱辣辣，焗到個包有啲水氣，同迫咗啲油份出嚟。我估如果即刻食個包應該係幾香同有幾分脆口！！不過好彩漢堡同埋其他材料都唔錯，好鍾意佢仲係好熱，唔似普通連鎖快餐店已經整好曬，冇乜香氣。佢嘅芝士真係用咗喺漢堡度，而雞髀菇亦都真係炒/煎得幾香！整體來講，都真係幾滿意。可能下次拎走嘅時候唔綁實，希望減少啲水氣啦🤣或者如果可以改一改良下個外賣包裝就好啦。