雄記美食

營業中

休息中

住咗喺灣仔十幾年，呢幾年從媒界聽到有間雄記好出名，但每次經過佢門口，唔係排緊長龍就係無開門，後尾聽講要從FB嘅post 先知果日會唔會開門，心諗有無咁巴閉，係咪真係咁好食，還是俾D睇小X書嘅人食。今日放假，專登等午飯時間後先去，終於有位坐唔駛排，但已經被提醒某一D食物已售罄，三點咋😓。好快咁叫咗個中辣咖哩牛腩麵，豬骨粥，煎蛋蝦米腸，無耐食物上枱，粥好棉，蝦米腸蛋好滑，咖哩好香，牛腩好腍，食緊嘅時候，雄哥攞住碗糯米飯走過嚟叫我幫手食咗佢，我真係唔識反應，第一次幫襯唔係熟客，但受到熟客一樣嘅招待，感動🥲。邊食邊參觀兩邊牆上面嘅相，poster，figures ，留言等，好滿意嘅一餐，食物味，人情味，地道味全部有齊，無嚟錯，下次必定會再幫襯試埋其他嘢食👍。