花園餐廳 (已搬遷) 新店位置

話明唔去唔去, 點知又去多次, 點解? 咪因為唔信邪囉, 好就比多個機會佢啦! 但係到底結果會係喜出望外定係失望而回呢?兩個人去到發覺勁多人, 師傅心諗係咪真係咁好味呀? 不過應該係撞午膳時間, 但最後都要等成十五分鐘先有位!一坐底即刻睇下有咩食啦, 有鐵板午餐, 特餐, 午餐等等, 思想鬥爭左一陣, 最後決定要兩個鐵板午餐, 而兩個鐵板午餐都係要左鑊仔牛柳, 一紅一白湯!最先黎竟然係餐湯, 紅湯係羅宋湯而白湯係忌廉粟米湯, 羅宋湯完全唔似羅宋湯, d料都幾多又夠紅, 但就唔夠味又唔辣, 叫雜菜湯會好d囉, 而忌廉粟米湯都幾多粟米, 不過就比較水, 一d都唔忌廉, 不過師傅都會覺得白湯好過紅湯; 而餐包就熱辣辣好鬆軟, 幾好味; 牛柳要左五成熟配埋佢地招牌黑椒汁, 牛柳好薄好鬆, 而肉地又唔會鞋, 黑椒汁夠香夠辣, 都幾好啦, 再配上炸薯條, 炸薯條都幾鬆脆, 唔會太硬, 可以喎!總括黎講呢度食物質素都可以, 比師傅想像中好, 而環境都舒服, 服務就普普通通, 可以接受, 而鐵板午餐都係四十五蚊, 而且冇加一, 不防一試! 今次結論都算喜出望外, 呢一間師傅覺得可以再黎!