Anjappar Chettinad Indian Restaurant

營業中

休息中

本身對印度菜有少少偏見，覺得口味太重，但係近期流行食Naan，今日朋友就話要帶我黎食印度菜。餐廳牆身有唔少印度花紋，而且侍應客人應該大多數都係印度人，睇黎依度嘅印度菜非常正宗。首先叫咗大蒜炸雞肉串燒(細，$70)，一共4件，用竹筒形狀嘅碟裝住，可以見到有被串過嘅痕跡。雞肉非常嫩滑，烤得剛剛好，點上青醬後帶有陣陣清香味。芝士烤餅($30)，一共4塊，薄薄嘅，本身以為只會係面頭上灑上芝士，點知原來啲芝士係包咗係薄餅之中，非常香滑。烤餅同咖哩一齊食就最好不過，所以叫咗蘑菇瑪沙拉($70)，估唔到係甜嘅咖哩，口味比想像中唔重，蘑菇好鮮甜，用烤餅夾住最正。雞肉餡斯理蘭卡酥餅($70)，依間印度餐廳都有提供唔少附近特色菜。以酥皮作為外層，入面包住雞肉粒同埋其他香料，辣得黎又愈食愈上癮。難得黎到正宗嘅印度餐廳，緊係黎番杯印度特色新地($90)。賣相好靚，有一個小傘插係上面，以雪糕、水果、玫瑰糖漿混上傳統細麵條、明列籽做主打，聽聞玫瑰糖漿係女人嘅聖名，對養生唔錯。