金牛火鍋飯店 (已結業)

成日都經過呢間金牛火鍋，天氣開始轉涼，終於到打邊爐嘅季節，一於試試呢間啦～嚟之前當然做下功課先啦！見到好多食家都話呢度嘅海鮮同牛好得，啱哂！我至愛呀！一坐底就叫個海鮮鍋先，鍋內有蕃茄粟米冬瓜，另上海鮮，等你自己慢慢淥。呢碟湯料無得頂！！！兩隻奄仔蟹好多膏，好甜，諗住啲肉一般啦，點知都係好好味，好鮮！五寶丸有牛肉丸，豬肉丸，墨魚丸，蝦丸同鯪魚球；我唔食鯪魚，所以轉埋做豬肉丸。我喜歡墨魚丸同蝦丸，幾彈牙，味道幾鮮。全晚最注目嘅主角出場！手切本地牛，雖然我哋只得兩個人，但太愛牛喇，都係叫碟大嘅～～ 好爽口，好有牛味，愛牛嘅你一定唔好錯過！我好喜歡食竹笙，因為佢又爽口，吸收哂湯汁放入口，嘩～～～好正！見到有呢個竹笙蟹皇卷，即刻要叫啦！真係無失望！如果價錢商宜少少就好喇！我哋好喜歡食香口嘢，叫呢個椒鹽鴨舌食，可怕唔夠香口，味道可以，下次應該唔會叫喇⋯⋯另外，我叫咗支竹庶茅根嚟飲，真係失望，原來係鴻X堂嘅！！！不過我依然會再嚟，因為海鮮同個牛太正喇！期待下次再食過！