十三少 (已結業)

十分喜歡食酸菜魚，原來堅尼地城都有十三少食，所以今日就嚟食。 堅尼地城呢間分店舖面都好大好寬敞， 有好多卡位。 而且行現代中式風格， 感覺又舒服，又有特色。睇完menu覺得佢嘅二人餐係最抵食，所以就叫咗佢嘅二人餐， 兩個人都只係需要$338。涼拌土豆絲， 作為冷盤前菜呢個真係好好食， 初時見到佢有好多紅油，好驚好辣，點知原來只係十分微辣，酸酸辣辣， 配埋爽脆土豆絲，十分好食。麻辣豬手， 唔算好辣，但係豬手就煮到十分入味，麻辣汁配白飯食一流。 豬手十分淋，一啲都唔硬，仲有滿滿嘅骨膠原好厚肉， 值得推介。十三少酸菜魚， 主角酸菜魚一啲都冇令我失望。侍應話酸菜魚湯係可以飲用，因為係師傅每日特別淆製飲落酸酸辣辣， 而且仲可以自己揀辣度，我哋叫咗少辣，感覺剛剛好對於唔食得辣嘅朋友呢個都值得挑戰。 佢嘅魚片十分滑同入味， 配埋蘿蔔片，萵筍同菇，成個十分豐富。紅糖糍粑， 炸到脆脆嘅粑，咬落去煙煙靭靭，配紅糖漿，味道一流。