吉吉點 (已結業)

呢間吉吉點係我婆婆屋企附近, 其實我地一家人都成日幫襯. 貪佢點心好味又就腳, 侍應都好nice 好有親切感. 同埋最特別係呢度個師傅會每隔一排就推出新點心, 我地次次去到都會捧下場.首先我地每次去到都會叫兩碗老火湯飲, 佢D湯煲得好濃而且無味精, 真係呀媽級靚湯, 我地屋企少煲湯, 所以每次一定會黎飲佢D湯, 佢每日都會唔同款, 都係D時令湯水, 而家秋冬季就會多咗D滋潤湯水. 好正!另外我地都好鍾意呢度D腸粉, 每次都叫. 佢個皮做得好薄同好滑, 而且餡料都好多, 最重要係佢會有D蔬菜係裏面, 食落清新爽口又健康, 我地特別喜歡牛腸同蝦腸.今次我地試咗佢個酥香紫薯餅, 屬於甜點類, 佢係用酥皮做外層, 裏面係紫芯蕃薯. 佢個皮做得好脆, 而個紫芯蕃薯好軟滑, 暖暖地咁口感唔錯, 而且食得出個紫芯蕃薯係原味, 唔會有種人工甜的味道, 而係有種微微甘甜的味道, 做得幾好! 期待下一次又有新點心推出!