煮廚 (已結業)

身為西環人，都好少入士菲熟食中心搵食。屋企人想食有火喉嘅平價小炒，我就提議去試下煮廚，試下新野。一入到去，老闆娘好熱情，仲扶住兩位老人家坐低。以熟食中心嚟講， 士菲呢個都算幾乾淨，又有冷氣。天氣甘熱冇冷氣嘅真係搞唔掂！周圍熱氛都好熱鬧呀！一行四人叫左五樣野。第一道係椒鹽鮮魷。炸得好香脆可口，炸漿夠曬薄，唔會咬落口成口炸粉同好油！第二道 沙爹肥牛粉絲煲。賣相麻麻地，連相都冇影到😂 比較淡口，味道似沙茶醬多過沙爹醬。 牛肉煮得過熟，比較"鞋口"第三道 火腿蓉浸娃娃菜。一餐飯點都會叫碟菜食下。正常野，所以都係冇影相啦。第四道 窩貼小棠菜墨魚餅。呢個係老闆娘重點推介我地必食。呢個的確好有驚喜呀！窩貼皮炸得香脆無比，而且一啲都唔油膩！墨魚餡混入左小棠菜令到個口感更加豐富同埋彈牙，兩位老人家食到舔舔脷！第五道 大煲炒飯。用瓦煲裝住上， 熱辣辣香噴噴，而且份量非常驚人。好香蝦醬味，用料都幾豐富。 四個人都食唔晒，打包返屋企第二日再食過😂每人都唔使＄100埋單，經濟又實惠，要搵多啲機會再嚟食多啲！