微辣大排檔 (已結業)

我不嬲都有睇開youtube，微辣更加係好早已經追開，但係一直都冇咩機會過嚟試下， 咁啱黎開沙田，一於過嚟試一試佢。一入到嚟睇個名，呢排真係食大排檔嘢，但係睇下啲菜名，又非常之得意，呢度嘅餐單，係用咗微辣嘅演員重新命名，例如係yelo咖哩炒蟹，或者係何伯爆屎渠😂😂😂講返嘢食嗰邊先，我覺得食物嘅水準係有驚喜，本來以為呢啲嘅網紅店，通常淨係得個樣，實際食落去又唔差，甚至乎可以話幾抵食。我哋叫咗四樣嘢，第一樣係咪走雞。雞係用荷葉呢包住焗，所以雞有淡淡嘅荷葉味，另外雖然係類似豉油雞，但係又唔會太鹹，雞入面仲包咗唔同嘅配料👍👍👍 我哋試咗呢度嘅蝦多士，呢度嘅蝦多士係用蟹膏喺上面，除咗蟹膏仲有少少蟹子添，所以鮮味好濃，塊多士就唔會太油，都算唔錯再者，叫咗發記大香腸，唔知發哥係咪都鍾意食呢樣呢🤣 一上枱真係好大碌，餐廳係原條上，所以真係幾震撼下，味道都唔差，係類似台灣腸嘅味道。最後我哋叫咗個通菜清一清腸胃， 雖然係腐乳炒嘅，但係都唔會太鹹，而且份量都幾多👍