粵來順 (已結業)

朋友極力推薦粵來順晚飯話勁好味，菜式出自名廚陳國強師傅，一於約番三五知己去食啦～去到好多人，老一代廣東茶居格局，但都幾嘈，似小炒王啦～首先黎個杏汁豬肺湯，我就覺得都幾油，杏汁味香，但湯料味唔重，朋友話同上次平日靜果陣好大分別，感覺好似唔夠賣加水再煲咁😓炒粉絲，店員話係必食！食到蝦米、蝦籽好香口，但整體味道偏淡。糯米飯，料係夠，但唔太夠熱，合格架。咕嚕肉，全晚最出色👍由頭食到尾都係少少脆身嘅，味道亦恰度好處👍蜆介綾魚球，見到隔壁枱果碟係炸到凹凸又扁，我地開頭都有少少驚架，不過好彩我地果碟就只係炸得唔夠香透，剛剛熟。魚頭煲，全晚第二值得食，有別於平時食開嘅薑蔥魚頭煲，豆豉蒸好特別好香、魚滑。不過朋友就好失望，全程話上次好味好多，好後悔星期六去食，又勁嘈又趕住要你埋單走咁款。下次去都係平日非繁忙時段會好d😁😁