星君冰廳

營業中

休息中

因為喺附近返工，佢哋啲嘢食都係幾得，所以都幾經常嚟食早餐、午餐同下午茶。可能佢哋啲嘢食都幾好，繁忙時間真係好多人，我唔係好介意搭枱，不過我極度唔鍾意攬住個背囊或者一袋二袋食嘢，所以每次都想坐靠牆有長櫈啲枱，可以放啲嘢喺旁邊，唔使攬住。如果繁忙時間入嚟，佢哋會限住你坐呢度嗰度，今日佢哋叫坐近門口已經有兩個人嘅長櫈位，我坐低發覺個位好大風，我問有冇個冇咁大風嘅位，有個阿姐呼呼喝喝話：「而家咁多人，我唔可以俾你揀。」類似情況都耐唔耐會發生，今日我又食到一肚氣！😡叫咗嘢食都一陣，冇人俾落單紙，冇人俾湯。嗰個惡姐拎碗湯俾個客，個客話唔要，佢放喺我張枱，我想問下佢唔知落咗單未，佢大大聲話：「你又唔係同我落，我唔會知！」成間餐廳都聽到，連經理都問乜事。😓呢間餐廳啲蒸飯（除咗蒸雞）都好食，夠熱、夠份量同好味，問心嗰句，嘢食真係好味得。今日嘅豉汁鳳爪蒸排骨飯，夠熱、餸份量多、味道唔錯。我叫咗走蔥少飯，所以張相見到好少飯。我平日快快趣趣食完走人，知道佢哋多客，唔想「霸」住張枱。今日實在好激氣，所以寫完呢個review先走。第一次即埸寫，即時upload。