鳴 Fusion (已結業)

又係同朋友聚舊嘅時間,今次揀係尖沙咀嘅鳴fusion日式放題,貪佢係大家嘅中間點,夠晒方便。可能係星期二嘅關係,我地7點半上到去無乜人,所以唔使等就可以有位坐。呢度點餐方法有啲麻煩,我地要將想食嘅野嘅編號寫係點餐紙上面,搞到成日唔記得點左啲乜。野食方面,刺身好新鮮,而且切得幾厚,食落好有口感。個人覺得馬刀貝同立魚都唔錯。呢度嘅壽司不過不失,最鍾意食芥辣八爪魚,賣相雖然一般,但食落夠晒攻鼻,好刺激。熟食方面,推介嘅有一口紫薯年糕,日式牛柳粒同埋燒菠蘿。紫薯年糕嘅外層又香又脆,入面係軟綿綿嘅紫薯蓉,食落甜而不膩。牛柳粒大小適中,唔太韌亦唔會太生,加埋醬汁嘅香味實在太吸引。燒菠蘿又大又厚,而且又多汁,食落清甜。出去攞野飲嘅時候,我發現呢度有我以前中學好鍾意飲嘅碧泉蜜桃茶,令我喜出望外。甜品方面就有雀巢雪糕杯同牛奶樂。總括黎講,呢度野食係水準之上,況且人唔多,鍾意靜嘅朋友不妨黎試試。