東京築地拉麵 (已結業)

遲咗放工睇完戲，原本一早安排要去隔離排隊食火鍋等唔切喇🙈，好肚餓呀就過咗隔離食。為咗滿足我嘅食慾就係咁叫嘢食。呢度個Menu嗰啲菜名⋯⋯咁就俾佢嗰個乜鬼嘢仙境沙律賣相吸引左就叫咗。天氣熱就想食凍野，就叫咗個青檸冷烏冬。想食啲香口野就叫左泡菜餃子雞翼，見到燒菠蘿好開心又叫埋燒菠蘿。朋友仔叫咗個築地牛丼同埋沖繩黑糖竹蔗冰，我就飲芒之戀人。黑糖竹蔗冰普普通通，芒之戀人芒果味唔濃，似落咗芒果糖漿🙄。個沙律嚟咗我O左嘴，圖片只供參考😑食過屋企附近間秋月居沙律之後，呢個簡直唔入流，炸麵嘅size又細，仲要無料嘅🙄啲生果粒粒細粒到呢又少又冇汁。燒菠蘿就冇問題，燒完焦糖化咗好甜無渣。泡菜餃子雞翼雞翼冇乜肉，辣辣地幾香口。築地牛飯份量好少汁幾好味，好快就被朋友食咗都冇影相🙈。青檸冷烏冬比想像中清新，酸酸地幾開胃。用滔庭烏冬好滑口，不過都係好細碟食完都唔飽。不過價錢真係好平，都只係二百幾蚊。環境就牆上面有啲日本生活嘅的話都幾得意，但係去廁所好麻煩，要兜到隔離鋪頭後門入去。